Seniorenferien

Oberämtler Seniorenferien Mo.-Sa. 24.-29. Juni 2024

Die Seniorenferienwoche findet einmal im Jahr statt. Sie wird von den drei reformierten Kirchgemeinden Rifferswil, Kappel und Hausen sowie von der katholischen Pfarrei Herz Jesu gemeinsam getragen.

Die Oberämtler Seniorenferienwoche im Jahr 2024 wird von der Pfarrerin Irene Girardet unterstützt von einem Team begleitet und führt nach Seefeld in Tirol.
Die Flyer mit weiteren Informationen und Anmeldeformular finden Sie anbei:

FlyerSeniorenferienOberamtJuni2024.pdf

 

Anbei der Reiseberichte von der letzten Reise:

Oberämtler Senioreferie in Ämmetten   27.Juni – 2. Juli 2022

Mit drü liebevoller Hälferfraue und de Pfarrerin Ilona chönd 24 Pensionäre uf «Ämmetten» id Ferie ga. Eusi Aareis fangt sehr luschtig a nämli hinenume de Nächi na auf de Rate ga. Übere Albis entlang am Zürisee, vom Gottschälli us chömer dä de na vo obe gse, vo det gahts abe grad anen andere See. Z’Brunne tüemer de s Mittagässe nä. Am Vierwaldstättersee na -  vo Beckeried uf Ämmetten ufe tuet euis de Chauffeur Christian dur einigi Baustelle kurve. Im Hotel Seeblick chömed mir dän a und chönd scho gli i euisi Balkonzimmer ga, dur längi Gäng durs Hotellabyrint zu dene Zimmer, doch alli findet de Wäg all Tag immer. Scho gli wird eus es feins Nachtässe serviert. Dänn wird s’Elferaus, s’Uno und Drüeggsteinli gschmiert. Was ab jetz jede Abig mit vill Lache und Schwätze passiert. Mir händs nämli jede Abig luschtig und gmüetlich gha. Fasch vergässe zitig is Bett z’gah.

Es feins Zmorgebüffet gits für all. Nachher heissts – so chömed emal, mir wänd zäme e churzi Aadacht ha. Mit Anneros und Sigis Musig und guete Wort vo de Ilona fanged mir all Morge de Tag a. Dänn tüemer au all Tag es Reisli mache und erläbet vill Neus und schöni Sache.

De Zischtig fangt trotz echli Räge sehr schön a mit dem Seelisbärgbändli abe an See mir chönd go Schifffahre ga mit schöner Ussicht rundum bis uf Luzern det freie Usgang , das hämmer gern. Ueber die schön bluemigi Kappelbrugg laufe a de Rüss imene Beizli z’Ässe und z’Trinke chaufe. Deheim am Abig na öppe en Appero nä, da chas Cinar, Aperol oder Hugo gä. S’ghört eifach dezue oder .

Ueber Land durs Äntlibuech is Ämmital uf schmale Strasse isch öpe na neime en Puur am grase, uf Rötebach zum alte Würzbrunnechileli, Ueli de Chnächt hät det ghürate sis Vreneli. De Sigi lat det sis Alphorn ertöne und eus mit schöne Heimatkläng verwöhne. Im Chuderhüsi tüemer Zmitag nee wüsseder na was mer det händ gsee, mir glaubeds nüd doch sisch wahr da staht namal en Öpfelcar de Madöri-Vater und de Sigi tüend eus grad wieder verwöhne und lönd durs Ämmital us ihri Alphörner ertöne. En Halt gits na z’Truebschache äch zum möschtele Nei.. doch bim Kambly go Güetzi pöschtele.

S’Higligth bir Morgeandacht isch au cho. Mir tüend bi schönem Wätter ufs Högerli ue ga d’Lieder töned zwar echli zäch. Aber da obe simmer am Herrgott  eifach näch. I de schöne Bergwält chömer das gnüsse s’tuet öppe vor Ehrfurcht da und det es Tränli flüsse.

D’Göscheneralpstrass isch steil und sehr schmal da wirds glaub de einte im Buch echli schal. Es isch eus da duruf nöd so zum lache will Chauffeur Christian tuet das s’erschtmal mache. Bi Rägewätter chömedmer glücklich dobe aa. Guet häders gmacht euse Fahrer-Maa. Dänn wird’s Wätter doch no guet. Ufe zum Naturstaudamm mit frohem Muet de Sigi trait sis Alphorn überall ufe es tönt so schön id  Alpewält use, sisch Rueh und Friede überall mit däm Alphorn wiederhall.

Am Fritig gahts vo Sarne us ueche mir gönd de Brueder Chlaus go bsueche. I sim alte Wohnhus tuet eus d’Ilona vill wüssenswärts verzelle au warum är i de Ranft unde hät elei si welle. De letschti Znacht gits jetz im Hotel mir müend morn hei, sigs wies well.

De letschti Morge d’Stäge ab is Chilesääli ga. Anneros und Sigis Musig und berüerendi Wort vor Ilona. Dänn Koffere packe und scho gats los. De Christian füert eus ganz famos. En letschte Mittagshalt in Willisau vo det chömed die runde Ringli au. Vom Untertor zum Obertor laufe natürli nüd ohni Ringli z chaufe. Bim Car wartet all bim Obertor obe. Esther s’Obertor isch würkli d’obe!!     

Glücklich mit vill Erläbnis und Idrück chömed mer is Oberamt zrück.

Chömed doch all s’nächst Jahr wieder mit und nämed na Fründe und Nachbere mit zum Ferie gnüsse und nüd vergässe mal nüd sälber choche und eleige ässe.

d’Ilona, s’Rösli, d’Esther und d’Rosa müend hüt vo eus namal es herzlichs Bravo ha.

Schöni Täg hämer mitenand z’Ämmätten gsee höch die Bärge überem Vierwaldstättersee.

Trudi Buri